Beda Venerabilis, Historia Ecclesiastica Gentis Anglorum, 1, 24

monumenta.ch > Beda Venerabilis > 24
Beda, Historia Eccl. Gentis Anglorum, 1, XXIII. Ut sanctus papa Gregorius Augustinum cum monachis ad praedicandum genti Anglorum mittens, epistola quoque illos exhortatoria ne a laborando cessarent, confortaverit. <<< >>> XXV. Ut veniens Brittaniam Augustinus, primo in insula Tanato, regi Cantuariorum praedicaret; et sic accepta ab eo licentia, Cantiam praedicaturus intraverit.

Beda Venerabilis, Historia Ecclesiastica Gentis Anglorum, 1, CAPUT XXIV. Ut Arelatensi episcopo [Al., archiepiscopo] epistolam pro eorum susceptione miserit.

1	Misit etiam tunc isdem venerandus pontifex ad [Etherium Arelatensem. Pro concesso habetur errorem hic esse, Etherium poni pro Virgilio, cum Etherius tunc temporis Lugdunensis episcopus fuit. Sed an in eo consistat error valde dubitandum est. Primo enim epistola quae in Beda est ad Etherium Arelatensem, non invenitur eo titulo in Gregorii Registro. Deinde habetur in Registro alia epistola ad Virgilium Arelatensem, eiusdem quidem tenoris, sed alterius formae. Exinde colligo erratum potius esse in epistola, quam in nomine. Augustino abeunte Gregorius plures epistolas scripsit eodem die, earum originales in scrinio apostolico simul iacentes Nothelmus transcripsit, et quidni potuit unam pro alia sumere, et illam quae ad Etherium Lugdunensem scripta fuit, loco eius quae ad Virgilium Arelatensem, nominibus et titulis lapsu transpositis ad Bedam afferre. SMITH.---Ad Etherium Arelatensem. Imo ad Aetherium Lugd., ut scite asserit Sirmondus, t. I Conc. Gall., in not. ad p. 420. Praefuit Aetherius Lugd. ex a. 589 ad 602, ut colligitur ex Actis concil. et ex Rom. Pont. epist. Haec porro epist. Greg. M. data est X Kal. Aug., indict. 14, adeoque a. 596. Cui geminam habes l. VI Regist., epist. 52, inscriptam: Palladio episcopo de Sanctonis, Pelagio de Turonis, et Sereno de Massilia, episcopis Galliarum a paribus (Vid. Patrol. tom. LXXXVII, col. 836). Unde apparet fuisse illam commendatitiam circularem. In hunc errorem de Aetherii sede inductus videtur Beda a Nothelmo presbytero a quo hanc et alias epistolas Angliam spectantes de Romanae Ecclesiae scrinio acceptas et ad se delatas fuisse Beda ipse profitetur in praefatione suae Historiae ad Ceolvulfum regem. CHIFFL.] Etherium Arelatensem episcopum [DCXVI], ut Augustinum Brittaniam pergentem benigne susciperet, litteras, quarum iste est textus:
2	'Reverentissimo et sanctissimo fratri Etherio coepiscopo, Gregorius servus servorum Dei.
3	'Licet apud sacerdotes habentes Deo placitam caritatem religiosi viri nullius commendatione indigeant; quia tamen aptum scribendi se tempus ingessit, fraternitati vestrae nostra mittere scripta curavimus: insinuantes, latores praesentium Augustinum servum Dei, de cuius certi sumus studio, cum aliis servis Dei, illic [Al., illuc] nos pro utilitate animarum, auxiliante Domino, direxisse: quem necesse est ut sacerdotali studio sanctitas vestra adiuvare, et sua ei solatia praebere festinet.
4	Cui etiam, ut promptiores ad suffragandum possitis existere, causam vobis iniunximus subtiliter indicare. Scientes quod, ea cognita, tota vos propter Deum devotione ad solaciandum, quia res exigit, commodetis. Candidum praeterea presbyterum, communem filium, quem ad gubernationem patrimonioli [Al., patrimoniali] Ecclesiae nostrae transmisimus, caritati vestrae in omnibus commendamus.
5	Deus te incolumem custodiat, reverentissime frater. Data die decima Kalendarum Augustarum, imperante domino nostro Mauricio Tiberio piissimo Augusto, anno decimo quarto, post consulatum eiusdem domini nostri anno decimo tertio, indictione decima quarta.'