Beda Venerabilis, Historia Ecclesiastica Gentis Anglorum, 1, 13

monumenta.ch > Beda Venerabilis > 13
Beda, Historia Eccl. Gentis Anglorum, 1, XII. Ut Brittones a Scottis vastati Pictisque, Romanorum auxilia quaesierint, qui secundo venientes, murum trans insulam fecerint; sed hoc confestim a praefatis hostibus interrupto , maiore sint calamitate depressi. <<< >>> XIV. Ut Brittones fame famosa coacti , Barbaros suis e finibus pepulerint; nec mora, frugum copia, luxuria, pestilentia, et exterminium gentis secutum sit.

Beda Venerabilis, Historia Ecclesiastica Gentis Anglorum, 1, CAPUT XIII. Ut, regnante Theodosio minore, cuius tempore Palladius ad Scottos in Christum credentes missus est, Brittones ab Aetio consule auxilium flagitantes non impetraverint. [CAP. XIII. De hoc capite, exceptis descriptionibus sinuum et Muri a Beda insertis, vide Gildam, a sectione 11 ad 17.]

1	Anno Dominicae Incarnationis quadringentesimo vigesimo tertio, Theodosius Iunior post Honorium quadragesimus quintus ab Augusto regnum suscipiens [Viginti et sex annos tenuit. Nempe ab obitu Honorii. Sic in Trev. et in Cantabrigiensi, recte. Falso enim in Editis legitur viginti et septem annos. Quippe obiit Honorius anno Christi 423, 15 Augusti, ut observat Theophanes; Theodosius autem anno 450, V Kal. Augusti. Quare dici non potest quod imperarit Theodosius Iunior post Honorium annis XXVII, qui ex praemissis ne vigesimum quidem sextum imperii annum totum implevit.] viginti et sex annos tenuit; cuius anno imperii [Octavo. Baronius, ad a. 429, VII, dicit ex Prospero corrigendum esse Bedam, dum ait anno octavo imperii Theodosii iunioris missum esse Palladium a Coelestino Rom. pont., nam pontificatus ipsius Coelestini ab eo tempore post annos octo contigit, nempe Decimo sexto eiusdem Theodosii. Error Baronii quem supra notavi ad Chronicon in annis Honorii, hic etiam recurrit in annis Theodosii. Annos enim quibus Theodosius regnavit ante Honorii obitum, Beda Honorio merito adnumerat. Ac proinde non ex Prospero Beda, sed ex Beda Baronius corrigendus est.] octavo Palladius ad Scottos in Christum [Credentes . . . primus. Verba haec sunt antiquissimorum Bedae Mss., nec ullam mutationis admittunt suspicionem, sicut nec dubium aliquod quin Scotti ubicunque fuerint, Christianam fidem cum Palladius mitteretur, ex parte saltem receperint, vide etiam Chronicon, ad n. 4403.] credentes a pontifice Romanae Ecclesiae Caelestino primus mittitur episcopus [CCCCXXX]. Anno autem regni eius vigesimo tertio, Aetius [Al., Boetius] vir inlustris, qui et patricius fuit, tertio cum Symmacho gessit consulatum.
2	Ad hanc pauperculae Brittonum reliquiae mittunt epistolam [CCCCXLV], cuius hoc principium est: 'Aetio ter consuli gemitus Brittanorum;' et [In processu epistolae. Polydorus Virgilius, nescio unde acceptam epistolam dedit integram, sed sine ulla Mss. auctoritate.] in processu epistolae, ita suas calamitates explicant: 'Repellunt Barbari ad mare, repellit mare ad Barbaros; inter haec oriuntur duo genera funerum, aut iugulamur, aut mergimur.
3	' Neque haec tamen agentes quicquam ab illo auxilii impetrare quiverunt, utpote qui gravissimis eo tempore bellis cum Blaedla [Al., Bledda, Bleda] et Attila regibus Hunnorum erat occupatus. Et quamvis anno ante hunc proximo Bledla Attilae fratris sui sit interemptus insidiis, Attila tamen ipse adeo intolerabilis reipublicae remansit hostis, ut totam pene Europam excisis invasisque civitatibus atque castellis conroderet.
4	Quin et iisdem temporibus [Fames. Haec sunt verba Marcellini Comitis ad coss. Aeetium III et Symachum, indict. 14, et ad coss. Ardaburem et Callepium, indict. 15, quae Beda e Gildae satyra Brittonibus applicat capite sequenti.] fames Constantinopolim invasit: nec mora pestis secuta est; sed et plurimi eiusdem urbis muri cum quinquaginta septem turribus corruerunt; multis quoque civitatibus conlapsis fames et aerum pestifer odor plura [Al., plurima] hominum milia iumentorumque delevit.