Beda Venerabilis, Explanatio Apocalypsis, LIBER PRIMUS., CAPUT VIII.
| 1 | Et cum aperuisset sigillum septimum, etc. Post interitum Antichristi requies aliquantula futura creditur in Ecclesia, de qua Daniel ita praedixit: Beatus qui exspectat et pervenit ad dies mille trecentos triginta quinque (Dan. XII). |
| 2 | Quod beatus Hieronymus sic exponit: « Beatus, inquit, qui, interfecto Antichristo, supra mille ducentos nonaginta dies, id est, tres semis annos, dies quadraginta quinque praestolatur, quibus est Dominus atque Salvator in sua maiestate venturus. |
| 3 | » Quare autem post interfectionem Antichristi quadragesimum quintum dierum silentium sit, divinae scientiae est. |
| 4 | Nisi forte dicamus: dilatio regni sanctorum, patientiae probatio est. |
| 5 | Nota quod in sexto sigillo maximas Ecclesiae pressuras, in septimo requiem, cernit, quia Dominus, sexta feria crucifixus, in Sabbato quievit, tempus resurrectionis exspectans. |
| 6 | Hucusque de apertione libri clausi et sex sigillorum. |
| 7 | Nunc vero recapitulat ab origine, eadem aliter dicturus. |