monumenta.ch > Beda Venerabilis > 1
>>> Beda, Epistulae, EPISTULA II,AD ECGBERCTUM ANTISTITEM.

Beda Venerabilis, Epistulae, EPISTULA PRIMA,AD ALBINUM ABBATEM [Albinus abbas, cui venerabilis Beda hanc epistolam direxit, auctor ipsi fuit atque adiutor scribendae Anglorum Historiae, uti Beda testatur in epistola nuncupatoria ad Ceolwlfum regem. Albinus iste alius est ab Albino Flacco seu Alcuino, uno fere saeculo aetate superior; abbas vero in Cantuariensi monasterio sancti Petri. Is per Nothelmum Londinensis Ecclesiae presbyterum Bedae munuscula transmisit, et monumenta, quae Bedae necessaria erant in componenda Anglorum Historia. Haec omnia constant ex Bedae praefatione ad Ceolwlfum. Porro hanc epistolam ex ms. codice Mettensis monasterii sancti Arnulfi eruit, mihique transmisit vir religiosus domnus Placidus Beuvillonius, eiusdem loci tum subprior: quo in codice habetur haec epistola cum hac inscriptione: Incipit praefatio presbyteri ad Alcuinum abbatem. Quod argumento est superiorem epistolam praefationis vice in Anglicana Bedae Historia fuisse appositam a scribis nonnullis, qui Albinum hunc eumdem esse cum Alcuino putaverunt. Hic observare iuverit in vulgata Bedae epistola ad Wichredum de aequinoctio verno iuxta Anatolium, apponi exemplum anni DCCCLXXVI; quo exemplo adductus Baronius Bedae aetatem ultra hunc annum prorogavit. Verum in veterrimo huius epistolae exemplari, quod in bibliotheca Laubiensi asservatur, non comparet hoc exemplum, sine dubio insertum a librario, qui eo anno hanc epistolam describebat. (MABILL. Vet. Analecta.)]. [Giles, Opera Bedae, tom. I.]

1	Desideratissimo et reverendissimo Patri Albino, Beda Christi famulus, salutem.
2	Gratantissime suscepi munuscula tuae dilectionis, quae per venerabilem fratrem nostrum Nothelmum presbyterum mittere dignatus es, et maxime litteras, quibus me iam secunda vice in ecclesiastica gentis nostrae historia, ad quam me scribendam iamdudum instigaveras, creber adiuvare atque instituere curasti. Propter quod et ipse tibi rectissime eamdem historiam, mox ut consummare potui, ad transcribendum remisi.
3	Sed et aliud, quod te partim desiderare comperi, volumen tibi vice remunerationis aeque ad transcribendum destinavi, videlicet, illud quod de structura templi Salomonis atque allegorica eius interpretatione nuper edidi. Teque, amantissime Pater, supplex obsecro, ut pro mea fragilitate cum his, qui tecum sunt, famulis Christi, apud pium Iudicem sedulus intercedere memineris: sed et eos, ad quos eadem nostra opuscula pervenire feceris, hoc idem facere monueris.
4	Bene vale, semper amantissime in Christo Pater optime.

Beda Venerabilis HOME
bav1449.302 bmv343.360 bnf1615.256 bnf13013.174