Beda Venerabilis, De orthographia, {t}
| 1 | testor aliquid confirmans sententia; contestor cum quadam auctoritate adfirmans; protestor manifeste cauenda denuntians; obtestor aliquem iurare compellens; adtestor ad testimonium uocans, qui sit dignitate uel auctoritate eminens; detestor aliquid execrandum respuens. |
| 2 | trux ablatiuum in i et in e mittit, genetiuum pluralem in um et in ium: ab hoc et ab hac truce et truci, horum et harum trucum et trucium. |
| 3 | therion Graece, Latine fera; unde theriaca, quia feraliter occidit. |
| 4 | taciturnitas loquelae contraria est; silentium confusis uocibus siue tumultibus. |
| 5 | uerum sciendum quia sileo et taceo et reticeo et conticeo ab uno Graeco ueniunt σιωπῶ. |
| 6 | tenax beneficii, id est memor gratiae. |
| 7 | torques nomen generis communis, nam et in Mario Liuius genere masculino et Cicero feminino torquem posuere. |
| 8 | triumphat hostem qui superat; triumphat nos Deus cum superandi hostes auxilium tribuit. |
| 9 | Deo 'inquit' gratias, qui semper triumphat nos in Christo Iesu. |
| 10 | et iterum, expolians principatus et potestates, triumphans illos in semetipso. |
| 11 | transmigro uerbum duplicem significationem habet. |
| 12 | transmigro enim cum de loco ad locum iter facio; item transmigro dicitur cum additamento accusatiui casus cum aliquem de loco ad locum transfero, ut Nabuchodonosor transmigrauit Iudaeos de Hierusalem, et emigrabit te de tabernaculo tuo. |
| 13 | porro exemplum uerbi superioris, transmigraui in montem sicut passer. |
| 14 | transmigrans participium aeque dupliciter et de loco ad locum transiens aliquis et alium de loco ad locum transferens intellegitur. |
| 15 | turtur et masculino genere et feminino profertur. |
| 16 | tunc temporis aduerbium est, tum ordinis. |
| 17 | terga hominum sunt tantum, singulariter tergum; tergus quadrupedum, pluraliter facit tergora, id est coria. |
| 18 | tinguere dicendum, non tingere. |
| 19 | temeritas sine consilio, audacia post consilium. |
| 20 | temperantia animorum, temperatio rerum, temperies aurarum. |
| 21 | tapete, tapetis, tapeti a tapeti; et pluraliter tapetia, tapetium, tapetibus. Virgilius: qui forte tapetibus altis. |
| 22 | sed et hoc tapetum, huius tapeti, huic tapeto; pluraliter haec tapeta, tapetorum, tapetis. |
| 23 | Virgilius: instratos ostro alipedes pictisque tapetis. |
| 24 | sed et masculino genere dicit: pictosque tapetos. |
| 25 | turbo, si sit proprium, Turbonis facit; si appellatiuum, turbinis. |
| 26 | nam siue uentus siue quo ludunt pueri, hic turbo dicitur. Virgilius: torto sub uerbere turbo. |
| 27 | tumulus et tumens tellus et mons breuis et sepulcrum aeque uocatur. |
| 28 | teloneum, non theloneum, id est per t simplicem, non aspiratione addita. |
| 29 | est autem Graece telon, Latine uectigal. |
| 30 | tabes tantum singulariter dicitur, tendiculae et tenebrae tantum pluraliter. |