Beda Venerabilis, De arte metrica Ed.2, 1, XXIV. de rithmo
| 1 | haec de metris eminentioribus commemorasse sufficiat, quorum exempla copiosiora apud scriptores inuenimus. |
| 2 | praeterea sunt metra alia perplura, quae in libris centimetrorum simplicibus monstrata exemplis quisque cupit reperiet. |
| 3 | reperiuntur quaedam et in insigni illo uolumine Porphyrii poetae, quo ad Constantinum Augustum misso meruit de exilio liberari. |
| 4 | quae, quia pagana erant, nos tangere non libuit. |
| 5 | uidetur autem rithmus metris esse consimilis, quae est uerborum modulata conpositio, non metrica ratione, sed numero syllabarum ad iudicium aurium examinata, ut sunt carmina uulgarium poetarum. |
| 6 | et quidem rithmus per se sine metro esse potest, metrum uero sine rithmo esse non potest. |
| 7 | quod liquidius ita definitur: metrum est ratio cum modulatione, rithmus modulatio sine ratione. |
| 8 | plerumque tamen casu quodam inuenies etiam rationem in rithmo, non artifici moderatione seruata, sed sono et ipsa modulatione ducente, quem uulgares poetae necesse est rustice, docti faciant docte. |
| 9 | quomodo instar iambici metri pulcherrime factus est hymnus ille praeclarus: rex aeterne domine, rerum creator omnium, qui eras ante saecula semper cum patre filius; et alii Ambrosiani non pauci. |
| 10 | item ad formam metri trochaici canunt hymnum de die iudicii per alphabetum: apparebit repentina dies magna domini, fur obscura uelut nocte inprouisos occupans. |