monumenta.ch > Beda Venerabilis > 22
Beda, De Temporum Ratione, XXI. Quae sit feria in Calendis. <<<     >>> XXIII. De aetate lunae si quis computare non potest.

Beda Venerabilis, De Temporum Ratione, CAPUT XXII. Argumentum de qualibet luna vel feria. [

BRID. RAMES. GLOSSAE.---Quod ita solum sine labore currit argumentum, si numerum mensium singulorum per Kalendas, Nonas et Idus memoriter decantare consuescas. Ianuarius in Kalend. unum, in Non. quinque, Idibus tredecim. Si forte quaeris unde hi dies procedant, id est, Ianuarius in Kalend. unum, Februarius in Kal. XXXII, etc., quae sequuntur, dicito: Ianuar. in Kal. unum habet diem, qui etiam IV Non. habet; iunge unum et quatuor, et erunt simul quinque. In Non. V. Habet enim VIII Idus. Quinque et octo, sunt simul tredecim. In Idibus tredecim. Habet quoque novendecim Kalendas post Idus. Tredecim et novendecim sunt simul triginta duo. Sic igitur totum huius lectionis numerum a capite usque ad finem facillime reperire potes.

IOAN. NOV. SCHOLIA.---Est etiam vetus argumentum. Ad hoc caput, deinde ad id quod sequitur, tum ad id quoque quod praecedit, referendae sunt tabulae quas principio operis proposuit, praesertim has quas litteris maiusculis signavimus, A, B, G, I, V et X, quemadmodum ibi etiam annotavimus.

]

1 Est etiam vetus argumentum, non modo de Calendarum, verum et de quorumlibet inter Calendas dierum luna vel feria dignoscenda repertum, aliquanto quidem gravius ad discendum, sed maiorum tamen nobis auctoritate contraditum, atque ideo minoribus nostra aeque solertia tradendum. Si ergo vis scire hoc vel illo die quota sit luna, computa dies a principio mensis Ianuarii usque in diem de quo inquiris, et cum scieris, adde aetatem lunae quae fuit in Calendis Ianuariis; partire omnia per LIX, et si amplius XXX remanserint, tolle triginta, et quod superest ipsa est luna diei quam quaeris.
2 Item si vis scire hoc vel illo die quota sit feria, computa dies a Calendis Ianuariis usque in diem de quo inquiris; et cum noveris, adde feriam quae fuit die Calendarum Ianuariarum; et si bissextilis annus est, etiam bissexti diem postquam transierit augmentare memento: partire omnia per septem, et quod remanet diem tibi septimanae quae sit ubicunque quaeris ostendet.
3 Quod ita solum sine labore currit argumentum, si numerum mensium singulorum per Calendas, Nonas et Idus memoriter decantare consuescas.
4 Ianuarius in Calendas I, in Nonas V, in Idus XIII.
5 Februarius in Calendas XXXII, in Nonas XXXVI, in Idus XLIIII.
6 Martius in Calendas XL, in Nonas LXVI, in Idus LXXIIII.
7 Aprilis in Calendas XCI, in Nonas XCV, in Idus CIII.
8 Maius in Calendas CXXI, in Nonas CXXVII, in Idus CXXXV.
9 Iunius in Calendas CLII, in Nonas CLVI, in Idus CLXIIII.
10 Iulius in Cal. CLXXXII, in Nonas CLXXXVIII, in Idus CXCVI.
11 Augustus in Calendas CCXIII, in Nonas CCXVII, in Idus CCXXV.
12 September in Cal. CCXLIIII, in Nonas CCXLVIII, in idus CCLVI.
13 October in Cal. CCLXXIIII, in Nonas CCLXXX, in Idus CCLXXXVIII.
14 November in Cal. CCCV, in Nonas CCCIX, in Idus CCCXVII.
15 December in Calendas CCCXXXV, in Nonas CCCXXXIX, in Idus CCCXLVII.
16 Si ergo scire vis, verbi gratia, anno quo per Calendas Ianuarias nona est luna, quota sit luna in Calendas Maias, dicito: Maius in Calendas CXXI; tolle Calendas, remanent CXX; adde IX, fiunt CXXIX; partire LIX, quinquagies novies bini centum decus octus: tolle CXVIII, remanent XI; undecima est luna in Calendas Maias. Si vis scire quota est luna in XV Calendas Iunias, dicito: Iunius in Calendas CLII; tolle XV Calendas Iunias, remanent CXXXVII; adde IX, fiunt CXLVI; partire per LIX, quinquagies novies bini centum decus octus; tolle CXVIII, remanent XXVIII; vicesima octava est luna in XV Calendas Iunias.
17 Si vis scire quota est luna VII Idus Decembres, dicito: December in Idus CCCXLVII; tolle VII, Idus remanent CCCXL; adde IX, fiunt CCCXLIX; partire per LIX, quinquagies novies quini CCXCV; tolle CCXCV, remanent LIIII; tolle XXX, remanent XXIIII; vicesima quarta est luna die memorato. Iuvat huiusce argumenti usum, si calculator ultima quinquagesimae nonae partis diligentius memoriae commendat: quinquagies novies seni CCCLIIII, quinquagies novies quini CCXCV, quinquagies novies quaterni CCXXXVI, quinquagies novies terni CLXXVII, quinquagies novies bini CXVIII, quinquies novies assis IX. Eodem ordine diem septimanae quocunque volueris tempore adiuncto Calendarum Ianuariarum die requiris.
18 Si enim vis scire, verbi gratia, anno quo Calendae Ianuariae quinta feria celebrantur, octavo Calendarum Octobrium die quota feria sit, dicito: October in Calendas CCLXXIIII; tolle VIII Calendas Octobres, remanent CCLXVI; adde quintam feriam quae fuit in Calendis Ianuariis, fiunt CCLXXI; partire per VII, septies triceni ducenti decus, septies octoni quinquagies sexies, remanent V; quinta est feria octavo Calendas Octobres.
Beda Venerabilis HOME

bav1448.218 bav1449.133 bmv343.218 bnf1615.86 bnf2389.110 bnf7296.19 bnf13013.89 csg248.131 csg250.233 csg251.78

© 2006 - 2024 Monumenta Informatik