monumenta.ch > Augustinus > 2
   

Augustinus, Epistolae, 105, 1, 2.

1	Dicitis nos traditores; quod nec maiores vestri in maiores nostros potuerunt, nec vos in nos probare ullo modo poteritis.
2	Quid vobis vultis faciamus, qui quando vobis dicimus ut causam nostram et vestram patienter audiatis, non nostis nisi superbire et insanire?
3	Nam utique ostenderemus vobis, quia potius illi traditores fuerunt, qui Caecilianum et socios eius quasi traditionis crimine damnaverunt.
4	Et dicitis, recedite a plebibus nostris; quas docetis ut vobis credant, et Christo non credant.
5	Vos enim eis dicitis, propter traditores, quos non ostenditis, remansisse Ecclesiam Christi in sola Africa partis Donati: quod non de Lege, non de Propheta, non de Psalmo, non de Apostolo, non de Evangelio, sed de corde vestro, et de parentum vestrorum calumniis recitatis.
6	Christus autem dicit praedicari in nomine suo poenitentiam et remissionem peccatorum, per omnes gentes incipientibus ab Ierusalem (Luc. XXIV, 47): cui Ecclesiae ex ore Christi manifestatae vos non communicatis, et alios in vestram perditionem trahentes, liberari non vultis.

Augustinus HOME