Augustinus, Epistolae, 104, 3, 8

1	Nihil interest, inquis, quale videatur esse peccatum cum indulgentia postulatur.
2	Recte hoc diceres si de puniendis, non de corrigendis hominibus ageretur.
3	Absit enim a corde christiano, ut libidine ulciscendi ad poenam cuiusque rapiatur.
4	Absit ut in dimittendo cuique peccatum, aut non praeveniat preces rogantis, aut certe continuo subsequatur: sed hoc utique ne oderit hominem, ne malum pro malo retribuat, ne nocendi inflammetur ardore, ne vindicta etiam lege debita pasci desideret; non autem ne consulat, ne prospiciat, ne compescat a malis.
5	Fieri enim potest ut vehementius adversando, emendationem quisque negligat hominis quem gravius odit, et nonnulla molestia reddat coercendo meliorem, quem maxime diligit.