Ambrosius, Epistolarum classis I, 63, 29.
| 1 | Et quid de viris loquar? Iudith luxurioso Holophernis haudquaquam inflexa convivio, solo titulo sobrietatis desperatum lacertis virilibus reportavit triumphum, patriam obsidione exuit, ducem militiae suis manibus occidit (Iudith XIII). |
| 2 | Exemplum evidens, quod et illum terribilem populis bellatorem virum luxuria sua emollivit, et hanc feminam temperantia cibi fortiorem viris fecit. |
| 3 | Non hic in sexu suo victa est natura, sed in cibo suo vicit. |
| 4 | Esther regem superbum suis inclinavit ieiuniis (Esth. IV, 16). |
| 5 | Anna octoginta quatuor annos in viduitate sua ieiuniis et obsecrationibus in templo die ac nocte serviens, Christum agnovit (Luc. II, 37), quem Ioannes abstinentiae magister et quidam novus terrarum angelus annuntiavit (Matth. III, 4). |