Ambrosius, Epistolarum classis I, 63, 6.
| 1 | Stet igitur et vobis, ut eum non timeatis sedentem; sedens enim iudicat, sicut Daniel dicit: Throni positi sunt, et libri aperti sunt, et antiquus dierum sedit (Dan. VII, 9). |
| 2 | In octogesimo autem et primo psalmo scriptum est: Deus stetit in congregatione deorum: in medio autem deos diiudicat (Psal. LXXXI, 1). |
| 3 | Sedens igitur iudicat, stans diiudicat; et iudicat de imperfectis, inter deos autem diiudicat. |
| 4 | Stet vobis ut defensor, ut bonus pastor; ne vos lupi incursent graves. |