Ambrosius, Epistolarum classis I, 60, 2.
| 1 | Coniugium vis inter filios nostros componere. |
| 2 | Quaero utrum pares copulandi, an impares sint? Sed, nisi fallor, compares appellari solent. |
| 3 | Boves qui iungit ad aratrum, equos ad currum, pares eligit, et ut aetas conveniat et forma, nec natura discrepet, nec decoloret diversitas. |
| 4 | Tu copulare paras filium tuum, et neptem ex filia, hoc est, ut accipiat sororis suae filiam, diversa licet matre quam socrus editus. |
| 5 | Interroga nominum religionem: nempe avunculus iste illius, illa huius neptis vocatur. |
| 6 | Nec ipse te revocat sonus nominum; cum hic avum resonet, illa hoc nomen ad avunculum, quod ad avum referat? Quanta deinde etiam reliquorum confusio vocabulorum? Idem avus et socer vocabere, ea quoque tibi neptis et nurus diverso nomine nuncupabitur. |
| 7 | Mutuabuntur etiam fratres diversa vocabula, ut illa socrus fratris sit, iste gener sororis. |
| 8 | Nubat avunculo suo neptis, et immaculatorum pignorum charitas illecebroso amore mutetur. |