Ambrosius, Epistolarum classis I, 58, 16

1	Figura autem illa, quia in Aegyptiis confidit qui luxuriis deditus est, mancipatus lasciviae.
2	Nemo autem se luxui committit, nisi qui recedit a praeceptis Dei veri.
3	Ubi autem coeperit quis luxuriari, incipit deviare a fide vera.
4	Ita duo committit maxima crimina, opprobria carnis, et mentis sacrilegia.
5	Ergo qui non sequitur Dominum Deum suum, ingurgitat se luxuriae ac libidini, pestiferis corporis passionibus.
6	Qui autem se ingurgitaverit atque immerserit huiusmodi volutabris, perfidiae laqueos incurrit: Sedit enim populus manducare et bibere (Exod. XXXII, 6), et fieri sibi deos poposcit.
7	Unde docet Dominus quoniam qui duobus istis flagitiorum generibus dederit animam suam, exuitur indumento, non vestis laneae, sed vividae virtutis; cuius amictus non temporalis, sed aeternus est.
8	Vale, et nos dilige; quia nos te diligimus.