| 1 | Quamquam quantum est, Imperator, ut quaerendum aut vindicandum non putes, quod in hunc diem nemo quaesivit, nemo umquam vindicavit? Grave est fidem tuam pro Iudaeis periclitari. |
| 2 | Gedeon cum occidisset sacratum vitulum (Iudic. VI, 31), dixerunt gentiles: Dii ipsi iniuriam suam vindicent. |
| 3 | Quis habet Synagogam vindicare? Christus quem occiderunt, quem negaverunt? An Deus Pater vindicabit eos, qui nec Patrem recipiunt, dum Filium non receperunt? Quis habet Valentinianorum haeresim vindicare: quam pietas tua quomodo vindicat, cum eos excludi iusserit, nec conveniendi usurpare copiam (IV Reg. XXII, 2)? Si Iosiam tibi obiiciam regem Deo probatum, hoc in istis damnabis, quod in illo probatum est. |