Ambrosius, Epistolarum classis I, 32, 4

1	His vocibus congregavit sibi populos, quos non creaverat; Deus enim hominem ad imaginem et similitudinem suam fecit (Gen. I, 27), et diabolus sibi hominem vocis suae fraude sociaverat.
2	Congregavit sibi nationum populos, faciens divitias non cum iudicio.
3	Unde in proverbio est de divite avaro, quia perdix iste congregat divitias non cum iudicio.
4	At vero meus Iesus quasi iudex bonus cum iudicio omnia agit, qui venit, sicut scriptum est, dicens: Ego loquor iustitiam et iudicium salutis (Esai. LXIII, 1).