Ambrosius, Epistolarum classis I, 20, 15.
| 1 | Sed veniamus ad propositas lectiones. |
| 2 | Videtis diabolo tentandi licentiam dari (Iob. I, 12), ut boni probentur. |
| 3 | Invidet iniquus bonis profectibus, tentat diversis modis. |
| 4 | Tentavit sanctum Iob in patrimonio, tentavit in filiis, tentavit in dolore corporis. |
| 5 | Fortior in suo corpore tentatur, infirmior in alieno. |
| 6 | Et mihi meas divitias, quas in vobis habeo, volebat auferre, et hoc tranquillitatis vestrae patrimonium dissipare cupiebat. |
| 7 | Vos quoque ipsos mihi bonos filios gestiebat eripere, pro quibus ego quotidie instauro sacrificium: vos ruinis quibusdam publicae perturbationis conabatur involvere. |
| 8 | Duo igitur iam genera tentationis excepi. |
| 9 | Et fortasse quia infirmiorem me Dominus Deus novit, adhuc in corpus meum non dedit potestatem. |
| 10 | Etsi ipse cupiam, etsi offeram, adhuc me fortasse huic certamini imparem iudicat, et diversis exercet laboribus. |
| 11 | Nec Iob ab isto coepit certamine, sed in hoc consummavit. |