Ambrosius, Epistolarum classis I, 11, 3

1	Sed si unius miseratio vos inflectere potest, multo magis vos precatio omnium moveat sacerdotum.
2	Quis enim nostrum ei communionis societate iungetur, cum indebitum sibi gradum usurpare conatus sit, nec iure ad eum potuerit pervenire; et quem importune affectavit, importunissime repetere moliatur? Turbarum toties damnatus, incedit adhuc quasi praeteritis non perhorrescendus exemplis.
3	Qui plerumque (sicut in hoc concilio cognovimus, et vidimus) cum Arianis copulatus atque coniunctus erat eo tempore, quo turbare Mediolanensem Ecclesiam coetu detestabili moliebatur cum Valente: nunc ante Synagogae fores, nunc in Arianorum domibus miscens occulta concilia, et suos eis iungens; et quoniam ipse aperte in eorum congregationes prodire non poterat, instruens et informans quemadmodum pax Ecclesiae turbaretur: quorum furore respirabat, quod eorum posset fautores et socios emereri.