Ambrosius, Epistolarum classis I, 6, 11

1	Verum illis superba referentibus (Ibid., 13 et seq.), consilia pacis bello mutata.
2	Neque primo aut secundo conflictu cum plurimi a paucis afflictarentur, cedendum Israelitae adversis praeliis aestimarunt; quadringenta enim millia virorum bellantium adversum viginti quinque millia Beniamin tribus, et septingentos Gabaonitas expertos belli iuvenes decertabant.
3	Et cum sinistra sorte duo sibi iam cecidissent praelia; animi tamen promptus haudquaquam deposuit Israel vincendi fiduciam, et ulciscendi praesumptam spem.