Ambrosius, De excidio urbis Hierosolymitanae, LIBER QUINTUS., CAPUT V.
| 1 | Post haec ubi forense praelium paulisper quievit, internum successit. |
| 2 | Namque paschalis interventu celebritatis, subornatis plerisque Ioannes, qui quasi observationis gratia templum adirent, et tamquam sociis data ingrediendi copia, dolum patravit. |
| 3 | Ingressi enim specie civili, sed interius armati, reiectis exuviis gladios attollunt loricato pectore, et praeliari accincti munimine. |
| 4 | Quo terrore perculsi, qui intra templum inermes celebrati vacabant, exsilierunt, templumque vacuum dereliquerunt. |
| 5 | Eos illis secutis, et quos potuerunt comprehendere, iugulantibus, alios ultra templi circuitum persequentibus, irrumpendi Ioanni sociisque eius occasio data. |
| 6 | Caesi illic multi mortales; ita ut etiam qui non restiterant, affictis causis aliquibus iugularentur: nec tranquillitas quietis proderat, nec silentium tacitis, nec cedentibus patientia. |
| 7 | Comprehensisque interioribus templi, etiam Simonem inquietabat Ioannes in secundarium locum, Eleazaro caeterisque principibus factionis tertiae sibi subrogatis. |