Ambrosius, De Officiis Ministrorum, 1, 43

monumenta.ch > Hieronymus > csg75.281 > sluMscr.Dresd.A.145.b.85 > 43
Ambrosius, De Officiis, 1, XLII. <<< >>> XLIV.

Ambrosius, De Officiis Ministrorum, 1, CAPUT XLIII.

209	Quoniam de tribus virtutibus diximus, [Ibid., lin. 44: Sequitur ut de illa reliqua parte honestatis dicendum sit, in qua verecundia, etc.] restat ut de quarta virtute dicamus, quae temperantia ac modestia vocatur: in qua maxime tranquillitas animi, studium mansuetudinis, moderationis gratia, honesti cura, decoris consideratio spectatur et quaeritur.
210	Ordo igitur quidam vitae nobis tenendus est, ut a verecundia prima quaedam fundamenta ducantur: quae socia ac familiaris est mentis placiditati, proterviae fugitans, ab omni aliena luxu, sobrietatem diligit, honestatem fovet, decorum illud requirit.
211	Sequatur conversationis electio, [Cic. Offic. lib. I, p. 368, lin. 5: Est igitur adolescentis maiores natu, etc. Item lib. II, pag. 380, lin. 38: Facillime autem, et in optimam partem cognoscuntur adolescentes, etc.] ut adiungamur probatissimis quibusque senioribus. Namque ut aequalium usus dulcior, ita senum tutior est, qui magisterio quodam et ductu vitae colorat mores adolescentium, et velut murice probitatis inficit. Namque si hi qui sunt ignari locorum, cum solertibus viarum iter adoriri gestiunt; quanto magis adolescentes cum senibus debent novum sibi iter vitae aggredi, quo minus errare possint, et a vero tramite virtutis deflectere! Nihil enim pulchrius quam eosdem et magistros vitae et testes habere.
212	Quaerendum etiam in omni actu [Cic. Offic. lib. I, pag. 365, lin. 42: Altera autem quae proprie singulis est attributa; ut enim in corporibus, etc.] quid personis, quid temporibus conveniat atque aetatibus, quid etiam singulorum ingeniis sit accommodum. Saepe enim quod alterum decet, alterum non decet. Aliud iuveni aptum, aliud seni: aliud in periculis, aliud in rebus secundis.
213	Saltavit ante arcam Domini David [II Reg. 6, 14]: non saltavit Samuel; nec ideo ille reprehensus, sed magis iste laudatus. Mutavit vultum [Edit. et mss. non pauci coram rege: alii vero non pauciores, sed iidem antiquiores, contra regem, id est, ex adverso regis.] contra regem, cui nomen Achis [I Reg. 21, 13]: at hoc si fecisset remota formidine quo minus cognosceretur, nequaquam levitatis reprehensione carere potuisset. Saul quoque vallatus choro prophetarum, etiam ipse prophetavit; et de solo quasi indigno memoratum est: Et Saul inter prophetas [I Reg. 19, 24].