Ambrosius, De Helia et ieiunio, § 59
| 1 | ebrietas fomentum libidinis, ebrietas incentiuum insaniae, ebrietas uenenum insipientiae. |
| 2 | haec sensus hominum mutat et formas. |
| 3 | per hanc fiunt ex hominibus equi adhinnientes, siquidem naturali uapore corporis calidi et praeter naturam uini calore flammati cohibere se non queunt et in bestiales libidines excitantur, ut nullum tempus praescriptum habeant, quo deceat indulgere concubitu. |
| 4 | uocem amittunt, colore uariantur, oculis ignescunt, ore anhelant. |
| 5 | fremunt naribus, in furorem inardescunt, sensu excidunt. |
| 6 | hinc frenesis periculosa, hinc calculi grauis poena, hinc exitialis cruditas, hinc uomitus frequens semesas epulas cum internorum uiscerum cruore fundentium. |
| 7 | mentior, nisi eadem dominus per Hieremiam locutus est dicens: bibite et inebriamini et uomite: et cadetis et non surgetis. |