Ambrosius, De Helia et ieiunio, § 47
| 1 | primo minoribus poculis uelut ferentariis pugna praeluditur. |
| 2 | uerum haec non sobrietatis species, sed bibendi est disciplina. |
| 3 | etenim ut tragoediarum actores primo sensim uocem excitant, donec udae uocis aperiant iter, ut postea magnis possint clamoribus personare, ita isti quoque in principio prolusoriis se exercent poculis, ut inritent sitim, ne forte restinguant eam et satiati postea bibere non possint. |
| 4 | ergo ubi res calere coeperit, poscunt maioribus poculis, feruor inardescit Martius, cibo sitis exaestuat et, ubi inminui uisa, potu meraciore reparatur. |
| 5 | certant pocula cum ferculis et inter morsus saepe remittuntur. |
| 6 | deinde procedente potu longius contentiusque diuersa et magna certamina quis bibendo praecellat. |
| 7 | nota grauis, si quis excuset, si quis temperandum forte uinum putet. |
| 8 | et haec donec ad mensas perueniatur secundas. |