Ambrosius, De Fide ad Gratianum Augustum, 2, CAPUT II.
20 | Sed nolo praerogativa naturae suae et privilegio potestatis utatur. Non dicatur bonus, si non meretur, a nobis. Si hoc non meretur operibus, si beneficiis non meretur, abdicetur suae iure naturae, subdatur nostro iudicio. Qui iudicaturus de nobis est, non dedignatur iudicari; ut iustificetur in sermonibus suis, et vincat cum iudicatur [Psal. L, 6], |
21 | Hiccine ergo non bonus, qui bona tribuit mihi [Psal. XII, 6]? Hiccine non bonus, qui cum sexcenta millia populi Iudaeorum persecutoribus suis cederent, dehiscentem subito Rubri maris aestum individua aquarum mole divisit [Exod. XIV, 6 et seq.]; ut fideles circumfusa unda muniret, infidos refusa demergeret? |
22 | Hiccine non bonus, cuius imperio maria solidata fugientibus, saxa humefacta sitientibus; ut opus veri agnosceretur auctoris, cum humor rigesceret, petra inundaret [Exod. XVII, 6]? Quod ut agnosceres opus Christi, Apostolus dixit: Petra autem erat Christus [I Cor. X, 4]. |
23 | Hiccine non bonus, qui tam innumera populi millia, ne qua incesseret fames, in deserto pavit pane coelesti, sine usu laboris, cum fructu quietis [Exod. XVI, 13 et seq.]: ita ut eorum per quadraginta annos nec vestimenta veterascerent, nec calceamenta tererentur [Deut. VIII, 4], instar fidelibus futurae resurrectionis ostendens, quod nec factorum decor splendidorum, nec circumfusae virtutis nitor, nec vitae cursus periret humanae? |
24 | Hiccine non bonus, qui nobis coelum fecit esse, quod terra est; ut sicut in coelo, quasi in speculo quodam, stellarum lucentium refulgerent globi; ita etiam apostolorum et martyrum et sacerdotum, vice stellarum fulgentium, toto illucescerent chori mundo? |
25 | Ergo non solum bonus, sed etiam pastor bonus, hoc est, non sibi tantum, sed etiam ovibus suis bonus: Bonus enim pastor animam suam ponit pro ovibus suis [Ioan. X, 11]. Posuit plane animam suam, ut nostram levaret: sed pro divinitatis potestate posuit et sumpsit, sicut scriptum est: Potestatem habeo ponendi animam meam, et potestatem habeo sumendi eam. Nullus eam tollit a me, sed ego a memetipso pono eam [Ibid., 17, 18]. |
26 | Vides bonitatem, quia sponte posuit: vides potestatem, quia sumpsit; et tu bonum negas, cum ipse de se in Evangelio dixerit: Si ego bonus, quare oculus tuus nequam [Matth. XX, 15]? Ingrate, quid agis? Bonum negas, per quem bona speras, si tamen credas? Bonum negas, qui dedit nobis quae oculus non vidit, nec auris audivit [I Cor. II, 9]? |
27 | Mihi expedit ut bonum credam: Bonum est enim confidere Domino [Psal. CXVII, 8]. Mihi expedit ut Dominum confitear; scriptum est enim: Confitemini Domino, quoniam bonus [Ibid., I]. |
28 | Mihi expedit, ut iudicem meum bonum arbitrer; Dominus enim iudex bonus domui Israel. Ergo si iudex Dei Filius, utique quoniam iudex Deus bonus, iudex autem Dei Filius est; Deus bonus iudex et Dei Filius est. |
29 | Sed fortasse non credas aliis, non credas Filio; audi Patrem dicentem: Eructavit cor meum Verbum bonum [Psal. XLIV, 1]. Bonum ergo Verbum est, Verbum hoc de quo scriptum est: Et Verbum erat apud Deum, et Deus erat Verbum [Ioan. I, 1]. Ergo si Verbum bonum, Filius autem Dei Verbum est: bonus utique Deus est Dei Filius; etiamsi non placeat Arianis. Erubescant aliquando. |
30 | Iudaei dicebant: Bonus est [Ioan. VII, 12]. Etsi alii dicebant: Non est, alii dicebant tamen: Bonus est; et vos omnes bonum negatis. |
31 | Bonus est, qui peccatum unius donat; et bonus non est, qui peccatum mundi abstulit? De ipso enim dictum est: Ecce Agnus Dei, ecce qui tollit peccatum mundi [Ioan. I, 29]. |
32 | Sed quid dubitamus? Credidit iam Ecclesia bonum, et confessa est dicendo: Osculetur me ab osculis oris sui; quoniam bona ubera tua super vinum [Cantic. I, 1]; et alibi: Et faux tua tamquam vinum est optimum [Cantic. VII, 9]. Bonus ergo ille nos Legis et gratiae nutrit uberibus, coelesti curas hominum praedicatione demulcens; et nos bonum negamus, cum sit imago bonitatis, exprimens aeternae in se bonitatis effigiem, sicut et supra ostendimus scriptum, quia ipse est speculum sine macula, et imago bonitatis illius [Sap. VII, 26]. |