monumenta.ch > Hildegardis Abbatissa > 2
Hildegardis Abbatissa, Divina Opera, 3, I. Simplex collectio quarumdam visionum physicam tangentium de ventis superius et inferius firmamentum circumagentibus, de circulo superiore ad planetas ab occasu in ortum regradandos, et in cursu suo moderandos emittentes; de humoribus hominis qualitates aeris et ventorum invicem concurrentium suscipientibus: de venis et de intestinis totius humani corporis, quomodo sibi in diversis officiis cohaereant et cooperentur, et quibus de causis ab aequalitate vel temporie sua interdum dissideant. <<<     >>> III. Quid significet quod itidem ventus australis, sed et septentrionalis diversis anni solsticiis, alter ab austro in septentrionem attollat, alter a septentrione in austrum paulatim deprimat.

II. Quod omnes creaturae non minus in anima quam in corpore utilitati deserviant, et quid significet quod venti orientalis et australis cum collateralibus suis firmamentum ab oriente in occidentem circumvolvere conspiciantur. SHOW LINKS TO MANUSCRIPTS

1	Et iterum vocem de coelo ad me sic dicentem audivi: Omnes creaturas quas Deus tam in superioribus quam in inferioribus fecit, utilitati hominis adiunxit; quas si ille pravis actibus evertit, iudicium Dei ipsa cum vindicta super illum inducit.
2	Quae quamvis homini in corporali necessitate assistant, ad salutem quoque animae illius respicere non minus intelligendae sunt.
3	Nam ut vides quod ventus orientalis ventusque australis cum collateralibus suis flatibus fortitudinis suae firmamentum moventes, illud ab oriente usque ad occidentem super terram circumvolvi faciunt, hoc designat quod exspiratio timoris Domini exspiratio quoque iudicii Dei, cum caeteris virtutibus fortitudine sanctitatis suae interiorem spiritum hominis tangentes, cum velut in oriente bona incipere, et in his usque ad bonam consummationem, quasi ad occidentem carnalia convincentem, conversari et perseverare faciunt, quoniam cum homo Deum timet, iudicium eius pro excessibus suis incurrere pertimescit.
4	Unde cum sic bona incipit ut in illis perseveret, pro aeterna remuneratione studet.
5	Ibique ventus occidentalis, necnon et ventus septentrionalis ac collaterales ipsorum illud suscipientes, spiraminibusque suis impellentes, ab occidente usque ad orientem sub terra reiiciunt, quoniam exspiratio rectitudinis infernalibus poenis, exspiratione castigationis corporalibus tribulationibus et caeteris flagellationibus spiritum hominis exterrentes, terroribusque suis concutientes, cum iam in taedio lassitudinis bona operari velut ad occidentem declinans desinit, ad ortum iustitiae sub terrena calamitate reducunt, illum exhortantes, ne quasi in fine iustorum operum tepida facilitate victus succumbat, sed ut strenue ad initium sanctitatis redeat, quia non incipienti et negligenti, sed incipienti et perficienti merces beatitudinis dabitur.