monumenta.ch > Hieronymus > sectio 15 > VII.
Gregorius Turonensis, Historia Francorum, LIBER SEXTUS., , VI. <<< >>> VIII.
VII.
1 Eo tempore Ferreolus Ucecensis episcopus, magnae vir sanctitatis, obiit, plenus sapientia et intellectu; qui libros aliquos epistolarum, quasi Sidonium secutus, composuit. 2 Post cuius obitum Albinus ex praefecto per Dynamium rectorem Provinciae extra regis consilium suscepit episcopatum; quo non amplius quam tribus utens mensibus, cum ad hoc causa restitisset ut removeretur, defunctus est. 3 Iovinus iterum qui quondam Provinciae rector fuerat, regium de episcopatu praeceptum accipit. 4 Sed praevenit eum Marcellus diaconus, Felicis senatoris filius. 5 Qui convocatis comprovincialibus, per consilium Dynamii episcopus ordinatus est. 6 Sed et ipse vi pulsatus deinceps a Iovino, ut removeretur, conclusus in civitate, virtute se defensare nitebatur, sed cum non valeret, muneribus vicit.