| 1 | Gregorius Ioanni tribuno Sipontino. |
| 2 | Lator praesentium de status sui conditione nobis saepius conquestus est a Bonifacio nostro notario sibi violentiam irrogari. |
| 3 | Cuius rei cognitionem in fratris et coepiscopi nostri Vitaliani notitiam praevidimus perferendam. |
| 4 | Cuius causae meritum se examinasse professus est. |
| 5 | Sed quia ad proferendum iudicium se assurgere nullatenus dicit, hortamur magnitudinem vestram ut pro causa mercedis aeternae cum praedicto resideatis episcopo, et, rei meritum evidentius perscrutantes, quidquid vobis suadente iustitia visum fuerit, scripto decernite; et si de eius vobis certius libertate constiterit, nullis deinceps quorumlibet inquietudinibus ad rei decisae meritum provocetur, sed in ea qua vobis visum fuerit libertate declaratus secure permaneat. |