EPISTOLA LIX. AD IOANNEM ET FORTUNATUM EPISCOPOS, ET ANTHEMIUM SUBDIACONUM. Gregorii homines ac possessiones commendat.
| 1 | Gregorius Ioanni et Fortunato episcopis, et Anthemio subdiacono. |
| 2 | Ea quae filiis nostris ultro nos decet impendere, negare eis petentibus non debemus. |
| 3 | Et ideo quoniam filius noster gloriosus Gregorius expraefecto possessiones, quas illic habet, vel homines suos fraternitati vestrae a nobis studuit commendandos, scriptis vos praesentibus adhortamur ut utilitatibus eius salva ratione concurrere et possessiones eius atque homines tueri, sicut desiderat, debeatis; nec eos contra iustitiam a quibuslibet vexari aut patiamini praegravari. |
| 4 | Sed id agite, ut tuitione vestra praedicti filii nostri supplere praesentiam valeatis, quia ita se, sicut nostis, bene exhibuit cunctis, ut omnia solatia habere mereatur. |