EPISTOLA XVIII. AD PETRUM SUBDIACONUM. Ut Marcello ad victum et vestitum necessaria provideat, pastores in lapsorum locum et vicem curet substitui.
| 1 | Gregorius Petro subdiacono. |
| 2 | Insinuatum nobis est Marcellum Barunitanae Ecclesiae, ibidem in Panormitana civitate, in monasterio sancti Adriani in poenitentiam deputatum, non solum victus necessitatem pati, sed et nuditatis nimiam sustinere molestiam. |
| 3 | Pro qua re necesse habemus strenuitati tuae praesenti iussione praecipere, ut ipsi pro victu et vestimento stratoque ad continentiam, pueroque eius annonam, quantum prospexeris satis esse, constituas; ut inopia nuditasque eius tali providentia possint habere consultum, ut ea quae eidem viro deputaveris, tuis postmodum possint rationibus imputari. |
| 4 | Ita ergo fac, ut et nostram iussionem impleas, et tu quoque hoc ipsum bene disponendo, hac ipsa possis participari mercede. |
| 5 | Praeterea hoc tibi indagandum mandare curavimus, veteri quae iam inoleverat consuetudine postposita, ut si quae civitates in provincia Siciliae pro peccatis per sacerdotum lapsus a pastorali regimine vacare noscuntur, de clero Ecclesiarum ipsarum, vel ex monasteriis, si qui digni ad sacerdotalem locum possunt inveniri, perspicias, et ad nos inquisita primitus morum gravitate transmittas, ut grex uniuscuiusque loci per pastoris lapsum inveniri non debeat longo tempore destitutus. |
| 6 | Si vero vacantia quidem loca repereris, et nullus tali dignitate ex eadem Ecclesia congruus inveniatur, ad nos similiter inquisitione solerti renuntia, ut Deus quem dignum talibus ordinationibus iudicaverit, valeat provideri. |
| 7 | Non enim oportet ut unius excessu grex dominicus per praerupta possit sine pastore difluere. |
| 8 | Ita enim et locorum ordinatio proveniet, et revertendi lapsis ad gradum priorem, quo melius poeniteant, suspicio non manebit. |