monumenta.ch > Cassiodorus > XXXVIIII. FORMULA TUITIONIS.
Cassiodorus, Variae, LIBER SEPTIMUS, , XXXVIII. FORMULA CLARISSIMATUS. <<<     >>> XL. FORMULA DE MATRIMONIO CONFIRMANDO ET LIBERIS LEGITIMIS FACIENDIS.

XXXVIIII. FORMULA TUITIONIS.

1  Superfluum quidem videtur tuitionem specialiter a principe petere, cuius est propositi universos communiter vindicare. 2  sed quia securitatem tuam quorundam violentorum exsecranda temeritas inquietat, non piget dolentium querelis ad hanc partem pietatis adduci, ut quod omnibus praestare cupimus, supplicanti potissimum conferamus. 3  atque ideo diversorum te, quemadmodum quereris, dispendiis sauciatum in castra defensionis nostrae clementer excipimus, ut cum adversariis tuis non, ut hactenus, campestri certamine, sed murali videaris protectione contendere. 4  ita fit ut, truculentis viribus pressus, reddaris auxiliis regalibus exaequatus. 5  Quapropter tuitionem tibi nostri nominis quasi validissimam turrem contra inciviles impetus et conventionalia detrimenta nostra concedit auctoritas: ita tamen, ne, his praesumptionibus sublevatus, civile despicias praebere responsum et tu videaris insolens calcare iura publica, quem primitus detestanda premebat audacia. 6  et quia ministros efficaces nostra debet habere praeceptio nec decet principem loqui quod non videatur posse compleri, praesentis beneficii iussione, adversus Gothos illa, adversus Romanos illa, facile te fides et diligentia custodivit: quia nemo laborat defendere quod timetur offendi, dum praestans dominus fieri formidatur ingratus. 7  fruere igitur nostra clementia: beneficio laetare suscepto. 8  nam si ulterius a quoquam sub incivilitate temptaris, tua de inimicis potius vota complebis.