monumenta.ch > Orosius > sectio 2 > XXVII. GUDUIN SAIONI THEODERICUS REX. a. (523/536 ante Iun. 6)
Cassiodorus, Variae, LIBER QUINTUS, , XXVI. UNIVERSIS GOTHIS PER PICENUM ET SAMNIUM CONSTITUTIS THEODERICUS REX. (a 523/526 ante Iun. 6) <<<     >>> XXVIII. CARINO V̅ · I̅ · THEODERICUS REX. (a 5231526)

XXVII. GUDUIN SAIONI THEODERICUS REX. a. (523/536 ante Iun. 6)

1  Consuetudine liberalitatis regiae commonemur, ut Gothis nostris debeamus sollemnia dona largiri. 2  et ideo devotio tua millenarios provinciae Piceni et Samnii sine aliqua dilatione commoneat, ut eos, qui annis singulis nostrae mansuetudinis praemia consequuntur, pro accipiendo donativo ad comitatum faciat incunctanter occurrere, quatenus, qui bene nobis meriti fuerint, maiore munificentia gratulentur. 3  Inculpabiliter enim necesse est vivat, qui suam praesentiam novit principibus offerendam: bonos enim laus, malos querela comitatur. 4  decet etiam nos sub hac occasione singulorum facta perquirere, ut nulli possit perire quod fecit in acie. 5  nam si semper consuetudinarias res expectet exercitus, virtutem non potest amare neglectus. 6  trepidus discat ad iudicem venire, qui se non meminit aliquid audacter egisse: ut melius possit hostibus violentus insurgere, qui nostrae mavult imputationis vulnera declinare.