monumenta.ch > Cassiodorus > XVIIII. GEMELLO V̅ · S̅ · THEODERICUS REX. (a 508/511)
Cassiodorus, Variae, LIBER QUARTUS, , XVIII. ANNAE V̅ · S̅ · COMITI THEODERICUS REX. (a. 507/511) <<<     >>> XX. GEBERIC V̅ · S̅ · THEODERICUS REX. (a 507/511)

XVIIII. GEMELLO V̅ · S̅ · THEODERICUS REX. (a 508/511)

1  Decet principalem providentiam fessa refovere, ut asperitatem casuum mitiget lenitas iussionum. 2  non enim sentitur incommodum, si, quod per adversitatem constat oppressum, concessa prosperitas ostenderit sublevatum. 3  Siliquatici namque praestationem, quam rebus omnibus nundinandis provida definivit antiquitas, in frumentis, vino et oleo dari praesenti tempore non iubemus, ut haec remissio solutionis copiam possit praestare provinciis et respirent aliquatenus fessi praesentis salubritate decreti. 4  Quis enim ad vendendum non incitetur largius, cui solita dispendia subtrahuntur? portus nostros navis veniens non pavescat, ut certum nautis possit esse refugium, si manus non incursarint exigentum, quos frequenter plus affligunt damna, quam solent nudare naufragia. 5  sit hoc forsitan sub quiete tolerandum: nunc autem, dum provincialibus praestare cupimus, mercium dominis interim consulamus.