monumenta.ch > Cassiodorus > XVIII. ANNAE V̅ · S̅ · COMITI THEODERICUS REX. (a. 507/511)
Cassiodorus, Variae, LIBER QUARTUS, , XVII. IBBAE VIRO SUBLIMI DUCI THEODERICUS REX. (a 508/511) <<<     >>> XVIIII. GEMELLO V̅ · S̅ · THEODERICUS REX. (a 508/511)

XVIII. ANNAE V̅ · S̅ · COMITI THEODERICUS REX. (a. 507/511) SHOW LINKS TO MANUSCRIPTS

1  Consuetudo est nostrae clementiae probatae nobis fidei agenda committere, ut cum iudices delegamus praeditos tractatu maturo, locum prava nequeat invenire surreptio. 2  dudum siquidem ad nos multorum suggestione pervenit Laurentium presbyterum effossis cineribus funestas divitias inter hominum cadavera perscrutatum concussionemque mortuis intulisse, quem oportet viventibus quieta praedicare. 3  non abstinuisse perhibetur tam crudeli contagio piis dicatas consecrationibus manus: aurum exsecrabili quaesisse fertur affectu, quem suam decuisset egentibus dare substantiam vel sub aequitate collectam. 4  Quod te diligenti examinatione praecipimus indagare, ut, si veritati dicta perspexeris convenire, hominis ambitum eo tantum fine concludas, ne possit supprimere quod eum non licuit invenire. 5  scelus enim, quod nos pro sacerdotali honore relinquimus impunitum, maiore pondere credimus vindicandum.