monumenta.ch > Cassiodorus > XXXI. DROMONARIIS THEODERICUS REX. (a 507/511)
Cassiodorus, Variae, LIBER SECUNDUS, , XXX. FAUSTO P̅P̅O̅ THEODERICUS REX. (a 507/511) <<<     >>> XXXII. SENATUI URBIS ROMAE THEODERICUS REX. (a 507/511)

XXXI. DROMONARIIS THEODERICUS REX. (a 507/511)

1  Publicis debent utilitatibus insudare qui nomen dedere militiae. 2  quid enim agat homo, si professo desit obsequio, ut nec commoda privata reperiat nec gloriam strenuitatis adquirat? et ideo comiti sacrarum largitionum nostra praecepit auctoritas, ut in Hostiliensi loco constitui debeatis, quatenus fiscali humanitate recreati exeursus cum veredariis per alveum Padi solito more faciatis, ut diviso labore equis publicis debeat subveniri, quando cursus vester non atteritur, qui per vias liquidas expeditur. 3  non enim vobis nimio labore claudicare contingit, qui manibus ambulatis. 4  vehiculum vestrum non sentit iniuriam nec defectum patitur, quod unda potius currente portatur.