monumenta.ch > Cassiodorus > XII. COMITI SILIQUATARIORUM ET CURAS PORTUS AGENTI THEODERICUS REX. (a. 507|511)
Cassiodorus, Variae, LIBER SECUNDUS, , XI. PROBINO V̅ · Ῑ · PATRICIO THEODERICUS REX. (a. 507/511) <<<     >>> XIII. PRUMARITH SAIONI THEODERICUS REX. (a. 507|511)

XII. COMITI SILIQUATARIORUM ET CURAS PORTUS AGENTI THEODERICUS REX. (a. 507|511)

1  Si desideriis nostris commercia peregrina famulantur, si prolato auro adquiritur externa devotio, quanto magis suis bonis abundare debet Italia, cum nulla in parendo probetur sentire detrimenta? et ideo speciem laridi nullatenus iubemus ad peregrina transmitti, sed in usus nostros propitia divinitate servetur, ne, quod in nostris partibus conficitur, noxia neglegentia deesse videatur. 2  Cavete itaque, ne culpis quamvis parva praebeatur occasio, scientes periculum gravissimum fore, si studeatis vel leviter in iussa committere. 3  in qualitate est, non in quantitate peccatum: mensuram siquidem non quaerit iniuria. 4  imperium, si in parvo contemnitur, in omni parte violatur.