monumenta.ch > Hieronymus > csg75.280 > Dicuil, Mensura, 7, 9
Dicuil, Mensura, 7, VIII <<<     >>> X

IX ZITATLINKS EINBLENDEN

1  Idem Iulius locutus de Aegypto et Nilo, naturam crocodili refert, vera falsis commiscens, his verbis: Crocodilus, malus quadrupes, et in terra, et in flumine pariter valet: linguam non habet; maxillam movet superiorem. Et paulo post: Qualia anser insedit ova; metatur locum naturali providentia, nec alibi fetus premit, quam quo crescentis Nili aquae non possunt pervenire. 2  Et paulo post: In aqua obtusius vident, in terra acutissime. Hieme cibum nullum capiunt: quin etiam, quatuor menses a coeptu brumae, inedia exigunt. Alia quae scripsit de natura crocodili, idcirco hic praetermitto, quia in XII Etymologiarum libro, quisquis voluerit, inveniet. 3  In aliis quae sequuntur illi non sum credulus, ita paulo ante dicenti: Habitant in insula Nili homines forma exigui, sed audacia usque adeo periti, ut crocodilis se offerant obvios. Nam haec monstra fugientes sequuntur, formidant resistentes; et capiuntur, subactique etiam inter aquas suas serviunt, et perdomiti metu ita obsequuntur, ut immemores atrocitatis, victores suos equitantes in dorso vehant. Hanc ergo insulam et hanc gentem, ubicumque indicio odoris persenserint, procul fugiunt.