Thomas de Aquino ST I-II 113.1.2 Praeterea, unumquodque debet denominari ab eo quod est potissimum in ipso, ut dicitur in II de anima. Sed remissio peccatorum praecipue fit per fidem, secundum illud Act. XV, 'fide purificans corda eorum'; et per caritatem, secundum illud Prov. X, 'universa delicta operit caritas'. Magis ergo remissio peccatorum debuit denominari a fide vel a caritate, quam a iustitia.