Orosius Orosius, Historiae, Liber 3, Caput 1, 1 Anno ab urbe condita CCCLXIIII, quem annum sicut gravissimum propter ignotam sibi captivitatem Roma persensit ita magnificum propter insolitam pacem Graecia habuit, eo siquidem tempore, quo Galli Romam captam incensamque tenuerunt ac vendiderunt, Artaxerxes rex Persarum discedere ab armis et quiescere in pace universam Graeciam per legatos praecepit, denuntians contradictorem pacis bello inpetendum.