Orosius Orosius, Historiae, Liber 2, Caput 2, 5 deinde a primo anno imperii Nini usque quo Babylon a Samiramide instaurari coepta est, interveniunt anni LXIIII, et a primo anno Procae, cum regnare coepit, usque ad conditionem urbis factam a Romulo intersunt aeque anni LXIIII. ita regnante Proca futurae Romae sementis iacta est, etsi nondum germen apparet. eodem anno regni ipsius Procae Babylonis regnum defecit, etsi adhuc Babylon ipsa consistit.