Hincmarus Remensis Hincmarus Remensis, Vita S. Remigii, p72, 13 Mirantur quidam, quod cum vindicta mortali illam de praedicta villa expulit, et corpus eius in ecclesia sua sepeliendum recepit: quod nemo mirabitur, si perpenderit qua intentione sancti vindictas in delinquentes exerunt; videlicet ut si se recognoverint, hic recipiant quod merentur, ne post mortem aeternis suppliciis crucientur, sicut in libro Regum legimus de propheta illo, qui inobediens ori Domini exstitit, et a leone percussus interiit; et post ultionem perceptam, a leone corpus illius intactum permansit (III Reg. XIII): si autem hi se non correxerint, in quos vindictae procedunt, ut alii de flagellis eorum emendentur, et metuentes corrigantur, sicut scriptum est: Mulctato pestilente, sapientior erit parvulus (Prov. XXI).