Eccardus Sangallensis IV Eccardus Sangallensis IV, Casus Sancti Galli, 1, 1, 1 Salomonis tertii parentes cum essent clari et inlustres, ipsum Isoni sancti Galli monacho, tunc temporis doctori nominatissimo, tradunt erudiendum et clericatui initiandum. Quem adprime, ut aiunt, ipse erudierat; sed et Nokeri, Tuotilonis, Ratperti, Harthmanni commonachorum statui praetulerat et delicatius quasi canonicum educaverat. Creverant tamen inde clandestine inter summae indolis condiscipulos invidiae; et cum conliberales genere essent et ingenio, ut ea aetas solet, aequanimiter non ferebant alienum sibi, qui fratres essent, praeferri, et qui natalibus quidem essent pares, doctrinarum provectibus ab illo praeiri.