Drepanius Florus Drepanius Florus, Psalmi et hymni, p6, 1 Alme Deus rerum, coeli custodia cuius Legibus aeternis vertigine concita iugi Volvitur, immensi socialis machina mundi: Te coelum, et quidquid coeli tegit aureus umbo, Te chorus astrorum, te sol et menstrua luna, Te nimbi et nebulae, verrentesque aequora venti, Te lucis noctisque vices, te quatuor anni Tempora, transcursis in se redeuntia rivis; Te terra, et quidquid terras ambitque tegitque, Te freta, te curvis errantia flumina ripis, Te properi fontes, te iussae stare paludes, Te pronae pecudes, sortitaeque alta volucres, Te muti pisces, te virosi serpentes, Pro se quisque tremunt: age rerum maxime rector Sidereas acies oculorum blanda tuentum Ad famulos demitte tuos, vultuque serenus Aspice constructam tanta in mysteria plebem, Unum quae trino celebrant sub nomine numen.