Auctores varii Auctores varii, Carmina Burana, p2, p90, 1 Philippus Cancellarius (ca. 1170 - 1236) Dic, Christi veritas, dic, cara raritas, dic, rara Caritas: ubi nunc habitas? aut in Valle Visionis? aut in throno Pharaonis? aut in alto cum Nerone? aut in antro cum Theone? vel in fiscella scirpea cum Moyse plorante? vel in domo Romulea cum Bulla fulminante? Respondit Caritas: «homo, quid dubitas? quid me sollicitas? non sum, quo mussitas, nec in euro nec in austro, nec in foro nec in claustro, nec in bysso vel cuculla, nec in bello nec in bulla: de Iericho sum veniens, ploro cum sauciato, quem duplex Levi transiens non astitit grabato».