Cassiodorus Cassiodorus, Historia Ecclesiastica, 1, 9, 16 Sed etiam amplius habere sancivit eos qui in continentiae virginitate degebant, licentiam eis praebens masculis feminisque, licet aetate minoribus, testamentum facere contra communem legem. Omnes enim bene cogitare iudicavit, quorum opus esset Deum placare semper et philosophiae veraci vacare. Huius enim rei causa et antiqui Romanorum licenter testati virgines Vestales etiam sexto aetatis curriculo decreverunt.