Bernardus Claraevallensis Bernardus Claraevallensis, Sermones in Cantica Canticorum, 60, 7 Caeterum si vineae animae, flos opus, odor opinio est: fructus quid? Martyrium. Et vere fructus vitis, sanguis est martyris. Cum dederit, inquit, dilectis suis somnum, ecce haereditas Domini filii, merces fructus ventris. Propemodum dixissem, fructus vitis. Quidni sanguinem uvae dixerim meracissimum, sanguinem innocentis, sanguinem Iusti? Quidni mustum rubens, probatum, pretiosum, plane de vinea Sorech, torculari passionis expressum? Denique pretiosa in conspectu Domini mors sanctorum eius. Haec pro eo quod dictum est, vineas florentes odorem dedisse.