Cassiodorus Cassiodorus, Expositio in Psalterium, 3, 142, 4 Quamvis propheta plurimorum poenitentium meditatione fuerit exercitatus, tamen quantum futuris laudibus reddebatur vicinus, tanto compunctione cordis ad poenitentiae lavacra convertitur, ut salutari suffugio competenter ablutus, conspectibus Domini mundissimus appareret. Merito, ne illam sententiam confusionis audiret: Peccatori autem dixit Deus: Quare tu enarras iustitias meas? Prima itaque deprecatione rogat Dominum Christum, ne cum servo suo velit intrare in iudicium: sed perturbationi suae misericordiam ipsius supplicat subvenire. Secunda, velociter pervenire se petit ad veniam; ut deductus in viam veritatis, ab inimicorum liberetur insidiis.