Cassiodorus Cassiodorus, Expositio in Psalterium, 3, 117, 19 Fortitudo mea et laudatio mea Dominus, et factus est mihi in salutem. Non potest impulsus cadere, cui auxilium Domini fortitudo videtur praestare. Sed ne putaretur sola pericula declinare, quem Domini dona servabant, adiecit, factus est mihi in salutem: quia per ipsum aeternam vitam suscipiunt, per quem et saeculi huius ruinas evadere promerentur. Ipse enim est et fortitudo et laudatio aeterna beatorum.