Cassiodorus Cassiodorus, Expositio in Psalterium, 2, 68, 25 Intende animae meae, et libera eam: propter inimicos meos eripe me. Intende, dicit, animae meae, ut revera compos fiat liberationis, cum eam Divinitas propitiata respexerit. Sequitur quoque causa quare debeat intendi; scilicet, propter inimicos meos eripe me. Propter inimicos enim celerrimum petebat resurrectionis auxilium, ut qui contempserant crucifixum, tertio die resurgenti credere debuissent; quatenus tali beneficio liberati, a perpetua damnatione redderentur excepti.