Cassiodorus Cassiodorus, Expositio in Psalterium, 2, 56, 22 Quis virtutem psalmi huius, quis benevolentiam digne possit effari? Orat Christus, ut nos doceat; resurgit, ut nos erigat; laudes Patri dicit, ut nos instruat. Merito via nostra, merito redemptio, merito apud Patrem noster legitur Advocatus. Amemus clementem defensorem, ne patiamur severum iudicem. Ultra omnem esse constat amentiam reum toto corde non expetere, qui nos ad aeterna gaudia tam crebris admonitionibus cognoscitur invitare.