Hieronymus Hieronymus, Epistulae, 3, 78, 33 XXXI. MANSIO. Et profecti de Ietabatha, castra metati sunt in Hebrona. Tricesima prima Mansio interpretatur παρέλευσις, id est, 'transitus,' sive 'transitio.' Ad hanc venit verus Hebraeus, id est, περάτης, sive 'transitor' qui dicere potest: 'Transiens videbo visionem hanc magnam'; de qua et Psalmista canit: 'Et non dixerunt qui praeteribant, benedictio Domini super vos'. Praeterit enim figura huius mundi, et propterea sancti cupiunt ad meliora transire, nec praesenti statu contenti, ingemiscunt quotidie. 'Haec recordatus sum, et effudi in me animam meam, quoniam transibo in locum tabernaculi admirabilis usque ad domum Dei'. Multum est, si de omnibus Scripturis super verbo transitionis velim exempla congerere.