Hieronymus Hieronymus, Commentarii, in Ezechielem, 14, 45, 32 Completis autem duabus solemnitatibus primi mensis, hoc est, primae diei, et septimae eius, venit ad quartumdecimum diem mensis, in quo Paschae solemnitas est: de qua scriptum est: Etenim Pascha nostrum immolatus est Christus. Tunc comedimus septem diebus azyma in requie et securitate rerum omnium, quando fermentum malitiae, et nequitiae destruentes, manducamus azyma sinceritatis et veritatis, principe nostro cuncta haec pro nobis offerente, et primum pro seipso.